Яагаад гэнэт ухаан орсон юм шиг бичлэг оруулхаар шийдэв гэж уншигч маань гайхна байх л даа.  Тэр амархан. 

Монголын элчин сайдын яаманд утасдаж хэдэн зүйл лавлах хэрэг гараад, утасдав аа хөөрхий. Утасдаад, нилээд удаан дуудсаны эцэст нэг эмэгтэй хүн авч байх юм гэнэ. Учир начраа тайлбарлаад хариу хүлээтэл, өөдөөс маш сонин харьцаж байх юм гэнэ: "Өөш, чи хүе..." гэх мэтчилэн.

 

Тэр эмэгтэй нь ямар гээч хашааны банхаруудтай харьцаж өсөж том болсон юм бол, бүү мэд. Бас намайг хэн гэж бодсон юм байгаан, бүү мэд. Яагаад гадаадын элчин сайдын яаманд ийм хүн сууж байгаа юм бол, бас л ойлгомжгүй. Энэ бол цаг хугацааны нугчаанд дарагдах нууц биз. Ер нь албан байгуулагт, тэр тусмаа гадаадад нутаг төлөөлж явж байгаа бол жаахан ч гэсэн харьцааны соёл байхад илүүдэхгүй гэдгийг сануулахад, "Чи юугээ мэддэгийн" маягийн харьцаатай байгаа нь гайхал төрүүлэх нь ойлгомжтой. 

Ер нь манайхны хэний хэн нь болох нь ил гарч, жинхэнэ нүүр царай ил харагддаг нь гоё - алтны дэргэд гуйл шарладаг бол, манай зарим монгол золбин нь золбингоороо үлддэг. Золбин гичийг хашаанаас нь гаргаж болох боловч, хашаа болон золбин бүдүүлгийг нь толгойноос нь гаргаж хаяж болдоггүй. 

Энэ ярианы дараа өөрийн эрхгүй нутгаа санах нь тэр. Сонин сайхан харах санаатай мэдээ эргүүлтэл, түмэн олны анхаарлын төвд өршөөлийн хууль. Өршөөлийн хуулиар Энхбаяр суллагдаж, баахан улс төр хутгана гэсэн л твитүүдээр интернэтийн монгол сегмент дүв дүүрэн. 

Бахархмаар, хүмүүс улс төр сонирхож, бага ч болов ирээдүйдээ анхаарч байгаа нь. Даанч тэр улс төрдөө ямар ч ойлголтгүй нь хөөрхөн юм даа... 

Ер нь миний энэ хэдэн ухаан муутай бичлэгийг уншаад байдаг ухаалаг залуучуудад гэж хэлэхэд: бэлэн байцгаагаарай л гэж дамжуулмаар байна. Тун цөвүүн хүйтэн цаг ойртсоор л байна. Хонх хангинасаар л. Харин хэнийх нь араас хангинан цохилж байгаа болдоо. Чиний араас уу? Үгүй л байгаасай. 

© जगन्नाथ